Udalak Arrain Azokan Bermeoko tabernetan euskal musika entzuteko aukera zabaldu nahi du, eta, horretarako, Spotifyn zerrenda publikoa sortu du (Bermeo_Euskeraz Arrain_Azoka_2017_Euskeraz). 100 kanta baino gehiago jaso dira zerrendan eta  erabiltzera gonbidatu ditugu tabernariak, guztiok euskaraz dantzatzeko eta gozatzeko aukera izateko.

Arrain Azokaren ondoren musika gehiago sartuko da zerrendan, estilo guztietakoa eta ostalaritzako establezimendu guztietara zabalduko da zerrenda. Publikoa denez, gainera, interesa duten pertsona guztiek erabili dezakete.

Gehiago irakurri

Bermeoko XXIII. Arrain Azoka maiatzaren 19, 20 eta 21ean izango da, eta bertaratzen diren guztiek egitarau zabalarekin gozatzeko eta euskaraz bizitzeko aukera izango dute.

Juan Karlos Agirrek, Bermeoko Euskara zinegotziak, azaldu duenez, Udalak Arrain Azokan Bermeoko tabernetan euskal musika entzuteko aukera zabaldu nahi du, eta, horretarako, Spotifyn zerrenda publikoa sortu du (Bermeo_Euskeraz Arrain_Azoka_2017_Euskeraz).  “Zerrenda erabiltzera gonbidatzen ditugu tabernariak, guztiok euskaraz dantzatzeko eta gozatzeko aukera izateko”, nabarmendu du.

Horrez gain,  Udalak herriko hainbat eragileekin elkarlanean martxan jarri duen ‘Geuk eus’ euskaraz bizitzeko 1.000 arrazoi kanpaina aurten ere Bermeoko Arrain Azokan presente egongo dela adierazi du; izan ere, maiatzaren 19an, 20an eta 21ean bere karpa propioa izango du, bideo-photocall karpa, hain zuzen be.

Bertan Kalinpanek lagunduta, nahi duten pertsonek euskaraz egiteko arrazoiak azaldu ahal izango dituzte barruan grabatuko diren bideoetan zein kanpoan aterako dituzten argazkietan. Helburua 100 bideo egitea eta 300 argazki ateratzea izango da.

Hortaz, Agirrek jende guztia animatu du “Arrain Azokan euskaraz egiteko dituzten arrazoiak azaltzera, guztion artean eta era benetan dibertigarrian, euskararen erabilera bultzatzeko eta sustatzeko”.  “Beraz, erdu danok Geuk eus karpara eta dantzatu dezagun guztiok euskaraz”, azpimarratu du.

Gehiago irakurri

Bermeoko Udalak eta herriko bost banketxek eta bi aholkularitzek elkarlanean errenta aitorpena euskaraz egitea sustatzeko hitzarmena sinatu dute gaur Bermeoko kultur etxean. Elkarlan horren bidez, entitate horiek errenta aitorpena euskaraz egiteko erraztasunak emango dizkiete bezeroei, eta Udalak sentsibilizazio lana egingo du.

Hitzarmenaren sinadura ekitaldian honakoek parte hartu dute: Idurre Bidegurenek, Bermeoko alkateak; Juan Karlos Agirrek, Euskara Saileko zinegotziak; Maite Alvarezek, Euskara teknikariak; Iker Otaoleak Torrealday aholkularitzaren ordezkariak, Javier Basterretxea Bermeo Consulting SL-ren ordezkaria eta Iñaki Kanalaetxebarria, Egoitz Bilbao, Joseba Markaida, Jose Luis Muruaga eta Nadia Nemeh, CaixaBank, Laboral Kutxa, Kutxabank, Banco Sabadell Guipuzcoano eta BBVAren Bermeoko sukurtsaletako zuzendari edota ordezkariak, hurrenez hurren. 

Gehiago irakurri

Geuk eus. Herri ikastetxeko jaian jarritako karpara hurreratu zirenen argazkiak eta bideoak argitaratuta hemen.

Gehiago irakurri

Errenta aitorpena egiteko edozein bide erabilita ere, euskaraz egiteko aukera badago.

Interneta, Ogasunak etxera bidaltzen duen likidazioa, era mekanizatua, banketxe edo aholkularitzara joanda, bide horietako edozeinetan euskaraz egiteko eskatu dezakegu eta horrela, arlo honetan ere euskarari atea zabaltzen diogu.

Aitorpenean erabiltzen diren berbak eta kontzeptuak errazak ez direnez gero, Udalak UEMAren laguntzagaz etxe guztietara bidali duen eskuko orrian, hiztegia txertatu du, laguntza modura.

Arlo honetan ere, eman bidea euskarari.

Gehiago irakurri

Bermeoko Udalak bermeotarrak zoriondu ditu Korrikan euskararen alde erakutsi duten “indarragatik”, izan ere, Korrika “oso jendetsua” izan da Bermeon eta adin eta egoera guztietako pertsonek parte hartu dute (gazteak, umeak, nagusiak, familiak, maisu-andereñoak, herriko kultur, kirol eta elkarte sozialak, erakundeak, sindikatuak…).

Juan Karlos Agirrek, Bermeoko Euskara zinegotziak, adierazi duenez, hizkuntzaren erabileraren azken kale-neurketak datu “kezkagarriak” erakutsi dizkigu Bermeon. Horregatik, bere esanetan, eguaztenean, apirilaren 5ean, “Korrikan Bermeok erakutsi duen indarra ikusterakoan asko poztu gara, Bermeon euskararen alde egiteko gogoa badagoela agerian jarri duelako”.

Agirrek adierazi duenez, “euskaldun izatearen harrotasuna eta emozioa argi ikusi ziren Korrikan Bermeon; eta, euskaldun garen heinean,  erakutsi dugun emozio hori, herrian euskara gehiago egiteko indarra izan dadin gurako genuke, bermeotarron eguneroko bizitzan euskara erabiltzeko indarra, bai ume eta gazteen artean, gurasoen artean, kirolariek euren entrenamendu eta kirol jardueretan, kultur eta talde sozialek euren egitekoetan, erosketak egiterakoan, lanean…”.

“Bermeok Korrikan erakutsi duen indarra bihotzetik mingainera eraman dezagun eta euskaraz berba egin dezagun”, azpimarratu du Euskara zinegotziak.

Gehiago irakurri

Bermeok hizkuntza-erabileraren kale-neurketa egin du, eta horren emaitzen berri eman dute gaur prentsaurrekoan Juan Karlos Agirrek, Bermeoko Euskara zinegotziak, eta Maite Alvarezek, Bermeoko Udaleko Euskara teknikariak.

Juan Karlos Agirrek azaldu duenez, Euskal Herrian bost urtetik behin herriko kaleetan euskararen neurketa egiten da, eta 2016an, Euskal Herri osoko 129 euskal udalerritako 450.000 lagun ingururen hizkuntza erabilera neurtu da, hain zuzen ere. Bere esanetan, “lehenengoa 1989an egin zen eta, orain, Bermeon 2016ko irailean, 6.353 bermeotarren hizkuntzen erabilera neurtu da”.

Neurketa Soziolinguistika Klusterrak egin du; eta, metodologiari dagokionez, Maite Alvarezek azaldu duenez, neurtzaileak inori ez dio ezer galdetzen, ibilbide eta ordu ezberdinetan entzuten duen hizkuntza erregistratzen du. Neurtzerako orduan kontuan hartzen du umeak, gazteak, helduak edo zaharrak diren eta bakoitzaren sexua ere bai. Horrez gain, umeak eta nagusiak elkarrekin dauden ere ezberdintzen du.

Gehiago irakurri

Bermeoko Udaleko Euskara Sailak deituta, martxoaren 9an Euskara Aholku Batzordeak urteko lehen bilera egin zuen. Hainbat gai izan zituzten aztergai.

Horri buruzko informazio gehiago gura duenak akta hemen irakurgai.

Gehiago irakurri

Euskarazko abizenak euskal grafiarekin idazteko ‘Izena duenak izana du’ sentsibilizazio kanpaina martxan jarriko du martxoan Bermeoko Udalak, UEMAren laguntzarekin, “munduan euskaldunek presentzia izateko”. Helburua da euskal abizena era ofizialean gaztelaniazko grafiaz idatzita duenak pausua ematea eta epaitegian eskatzea aldaketa, eta horretarako, UEMAk prestaturiko informazio-orria eta kartelak banatuko dituzte Bermeoko Udalak eta hainbat eragilek.

Aipatutako informazio-orrietan jasotzen denez, hiru pausu erraz eman behar dira abizenak euskal grafiaz idazteko. Horrela, adierazten denez, interesa duen pertsona lehenik eta behin erregistro zibilera edo bake epaitegira joan behar da, eta abizena euskal grafiaz ipini nahi duela esan. Bertan, emango dioten eskaera orria beteko du bere datuekin.

Ildo berean, agiri hauek eraman behar dira: nortasun agiriaren fotokopia (adinez nagusia ez denak gurasoena eraman behar du); hitzez hitzeko jaiotza ziurtagiria (epaitegian eskatzen da); errolda agiria (Udaletxean eskatzen da eta, adinez nagusia ez bada, gurasoena beharko du); familia liburuaren fotokopia (familia edo seme-alabak baditu); eta seme-alaben nortasun agiriaren fotokopia, 16 urtetik gorakoak badira.

Horrez gain, izena edota abizena euskaraz nola idatzi behar den kontsultatzeko www.euskaltzaindia.net. web gunean bilatu ahal izango da informazio osatua.

Informazio-orriak udal zerbitzuetan (Berhaz, Behargintza, Udal liburutegia, Kultur etxea, Musika eskola eta Kiroldegia) eta Bake Epaitegian egongo dira, baina beste toki batzuetara ere zabalduko dira, besteak beste, ikastetxeetara eta anbulatoriora.

Juan Karlos Agirrek, Bermeoko Euskera zinegotziak, adierazi duenez, kanpaina honek emaitzak positiboak izaten ditu. “Hala adierazten du tramitatu den espediente kopuruak, izan ere, 2016an aurreko urtean baino hamar espediente gehiago tramitatu dira, 46 espediente, hain zuzen ere”, azaldu du.    

Euskara zinegotziak  izen-abizenak euskal grafiaz idazteko prozesua “erraza” dela adierazi du, eta herritarrak animatu ditu pausu hori ematen, “garrantzitsua delako euskaldunok munduan leku bat izatea, eta euskal abizenak euskal grafiaz idazten baldin baditugu horixe erakusten dugu”.

Jaiotza, ezkontza eta heriotza inskripzioak euskaraz

Beste alde batetik, epaitegietan egiten diren beste tramite batzuk ere euskaraz egin daitezkeela azpimarratu du. Hala, bada, epaitegian erregistratzen diren jaiotza, ezkontza eta heriotza-inskripzioetan, euskara erabiltzeko aukera badago.

Ildo honetan, 2016an jaio eta ezkondu diren bermeotarren erdiak gutxi gorabehera jaiotzak eta ezkontzak euskaraz inskribatu dituzte. Agirrek 2017an jaiotzen diren umeen eta ezkonberrien inskripzioak euskaraz egitera animatu ditu “arlo honetan euskaraz bizitzeko beste pausu bat emateko”.

Gehiago irakurri

Azaroaren 26an Kafe Antzokian Miñe lamiñe ekitaldian batu ginen. Han berba egindakoaren laburpena bideo batean jaso dugu. Eta amaieran Itziar Rekalde ipuin kontalariak eta ipuin lapikoko dinamizatzaileak bere umetako kontuak ekarri zizkigun, batzuk benetakoak eta beste batzuk… asmatutakoak? Egia esan, ez zitzaigun geratu oso argi… ipuin-kontalari trebea delako, dudarik gabe! Besteak beste, kontatu zigun nola jarduten zuten emakumeek sukaldeko txoko batean elkarrekin beharrean eta barriketan, eta nola bidaltzen zituzten umeak libra erdi tardantzaren eske, edo baita kilo eta erdi tardantzaren bila ere, batzuetan… batek daki zertarako, hainbeste! Bere kontaketa osoa beste bideo batean jaso dugu.

Gehiago irakurri